«Бәйтерек» холдингі үлескерлердің құқықтарын қорғау үшін жасанды интеллект негізіндегі көмекшіні енгізді

«Бәйтерек» ұлттық басқарушы холдингі» АҚ тұрғын үй саласындағы процестердің ашықтығын арттыру және цифрландыруды жүйелі түрде жалғастырып келеді. Осы бағыт аясында Холдингтің еншілес ұйымы – «Қазақстан тұрғын үй компаниясы» АҚ «Тұрғын үй порталы» ақпараттық жүйесінің базасында үлескерлерді қолдауға арналған онлайн-орталықты іске қосты.

Жаңа сервис Қазақстан Республикасының заңнамасына сәйкес үлестік тұрғын үй құрылысына қатысты өзекті ақпаратты ұсынады және жиі қойылатын сұрақтарға жауап береді. Платформаның негізгі элементі – генеративті жасанды интеллект технологиялары негізінде жасалған iBota атты интеллектуалды көмекші.

Көмекші үлескерлердің құқықтарын қорғауға және үлестік құрылыстың ашықтығын арттыруға бағытталған. Пайдаланушылар оның көмегімен құрылыс нысандарын сатып алуға қатысты сұрақтарына жауап алып, құрылыс салушылардың үлескерлердің қаражатын тартуға арналған рұқсат құжаттарының бар-жоғын «Казреестр» мемлекеттік жүйесі арқылы тексере алады.

«Бәйтерек» ұлттық басқарушы холдингі» АҚ Басқарма төрағасының орынбасары Үсен Ғалымның айтуынша, жаңа құралдың іске қосылуы үлестік құрылыс нарығындағы сенімділікті арттыруға бағытталған маңызды қадам болды:

«Бәйтерек» холдингі азаматтар, құрылыс компаниялары мен мемлекеттік институттар арасындағы өзара іс-қимылды барынша ашық әрі қауіпсіз ететін цифрлық шешімдерге ерекше мән береді. iBota жасанды интеллект көмекшісін енгізу үлескерлерге өзекті және нақты ақпаратты ыңғайлы форматта алуға, алаяқтық тәуекелдерін азайтуға және нарықтың ашықтығын арттыруға мүмкіндік береді», – деді Үсен Ғалым.

Жоба азаматтармен тиімді коммуникацияны нығайтуға, цифрлық қолдау құралдарын дамытуға және Қазақстандағы үлестік құрылыс жүйесіне деген сенімді арттыруға бағытталған.