«Бәйтерек» холдингі мен Tramite Group Қазақстандағы агрокластерлерді бірлесе дамытуды талқылады

«Бәйтерек» ҰБХ» АҚ Басқарма төрағасы Рустам Қарағойшин тағам өнімдерін және азық-түлік емес тауарларды өндіру саласындғы  инновациялық өнімдерді әзірлеу және енгізу, сондай-ақ өнімді ірі әлемдік нарықтарға жылжыту бағытында маманданған Tramite Group халықаралық компаниясының өкілдерімен жұмыс кездесуін өткізді.

Tramite Group-ты компанияның негізін қалаушы Джианантонио Трамет бастап келді, делегация құрамында халықаралық бизнес жөніндегі директор Алесандро Трамет, GUSTATO SAS негізін қалаушы Элизабет Густато болды.

Қазақстан тарапынан іс-шараға «Қазақстанның Даму Банкі» АҚ және «Аграрлық несие корпорациясы» АҚ Басқарма төрағаларының орынбасарлары Зәуреш Шалабаева мен Ерлан Оспанов, Экспорттық-кредиттік агенттіктің басқарушы директоры Эльдар Куанбаев, «Agriqa Farms» ЖШС директоры Сержан Стыбаев және компанияның акционері Айман Тұрсынқан қатысты.

Кездесуде агроөнеркәсіптік өндіріс, қайта өңделген өнім экспорты саласындағы ынтымақтастық мүмкіндіктері, сондай-ақ «Бәйтерек» холдингінің еншілес ұйымдарының құралдарын пайдалана отырып, қаржыландыру және коммерциялық сүйемелдеу тетіктері талқыланды.

Түркістан облысында жүзеге асырылып жатқан AGRIQA Шардара кластерлік жобасы келіссөздер аясында ұсынылған ерекше маңызды жоба болды. Жоба кезең-кезеңімен жылыжай кешенінің құрылысын, тамшылатып суару жүйесін енгізуді, сондай-ақ өнімді терең өңдейтін өндірістік базаны — қызанақ зауыты, жеміс-көкөніс комбинаты және құрама жем кәсіпорнын дамытуды қамтиды.

Тараптар жобаның қазіргі іске асырылу барысын, оффтейк-келісімшарттарды жасасу механизмін, экспорттық әлеуетті арттыру мәселелерін және Tramite Group компаниясының Түркістан облысындағы «Шардара» экспорттық-агроөнеркәсіптік кластеріне стратегиялық серіктес ретінде қатысу мүмкіндігін талқылады.

Сондай-ақ қаржыландыру құрылымы, кепілдікпен қамтамасыз ету, өнімді өткізу нарықтарын зерделеу және кластерді іске асырудың барлық кезеңдеріндегі жобалық құжаттаманы үйлестіру мәселелері қарастырылды.

«Біз агроөнеркәсіп саласындағы бірлескен жобаларға қызығушылық танытқан халықаралық компаниялармен диалогқа әрдайым ашықпыз. Мұндай кездесулер серіктестікті нығайтып, өзара тиімді ынтымақтастық үшін жаңа перспективалар ашады деп сенемін», — деп атап өтті Басқарма төрағасы Рустам Қарағойшин.

Кездесу қорытындысы бойынша тараптар одан әрі қарым-қатынас орнатуға мүдделі екенін растады.