«Бәйтерек» холдингінде Президенттік жастар кадрлық резерві мүшелерімен кездесу болып өтті

Қазақстан Республикасының Ұлттық экономика министрі Әлібек Қуантыров пен «Бәйтерек» ҰБХ» АҚ Басқарма төрағасы Қанат Шарлапаев Президенттік жастар кадрлық резервінің (ПЖКР) мүшелерімен кездесу өткізді.

Кездесуге сонымен қатар ҚР Мемлекеттік қызмет істері агенттігі төрағасының орынбасары Азамат Жолманов, сондай-ақ Холдингтің сегіз еншілес ұйымының басшылығы қатысты.

Әлібек Қуантыровтың айтуынша, қазіргі уақытта ҚР Ұлттық экономика министрлігінде (ҰЭМ) және ведомстволық бағынысты ұйымдарда 18 резервші жұмыс істейді.

- Біздің министрлік мемлекеттік органдар арасында ПЖКР мүшелерін жұмысқа орналастыру бойынша көшбасшы болып отыр. Жалпы, біздің жұмысымыз ашықтық және жаңа қағидаттар негізінде құрылады. «Бәйтерек» холдингі меритократия қағидатын ұстанатынына және кадрларды іріктеуге сапалы қарайтынына назар аударғым келеді, - деп атап өтті министр резервшілер алдында сөйлеген сөзінде.

Өз кезегінде Қанат Шарлапаев «Бәйтерек» холдингі ПЖКР-ге іріктеліп алынған жастардың әлеуетін жоғары бағалайтынын атап өтті.

- Біз кадрлық процесті транспаренттілік қағидаттарының шеңберінде ашық жүргізетін боламыз, барлық қатысушылар үшін мүмкіндігінше тең жағдайларды қамтамасыз етуге тырысамыз, бірақ бұл ретте, әрине, ПЖКР үлкен басымдыққа ие, - деп Холдинг басшысы өз сөзін жалғастырды.

Кездесу барысында кадрлық резервшілер экономика салаларын дамыту бойынша өз ұсыныстарымен сөз сөйледі, Министрлік пен Холдинг басшыларына сұрақтар қойып, оларға толыққанды жауаптар алды.