«Бәйтерек» холдингі мен John Deere Қазақстандағы стратегиялық серіктестік бойынша келіссөздерді жалғастыруда

3 желтоқсанда Астанада «John Deere» компаниясының ТМД және Орталық Азия елдеріндегі «Ауыл шаруашылығы және көгал жабындары» бағыты бойынша президенті Чаба Лейко мен «Бәйтерек» ұлттық басқарушы холдингінің басқарма төрағасы Рустам Қарағойшин арасында кездесу өтті. Тараптар АҚШ-тағы Холдинг делегациясының сапары барысында басталған диалогты жалғастырып, ынтымақтастықты тереңдету және бірлескен бастамаларды іске асыру перспективаларын талқылады.

Кездесу барысында Чаба Лейко Қазақстан Үкіметінің индустриялық секторларды дамыту және ауыл шаруашылығы техникасын өндіруді жергілікті деңгейде ұйымдастыру жөніндегі бастамаларын қолдауға дайын екенін растады.

Рустам Қарағойшин John Deere компаниясының Қазақстандағы қатысуын нығайтуға деген ұмтылысын қолдады.

«Холдингіміз John Deere секілді жаһандық көшбасшыларды жергілікті өндірісті дамыту және инновацияларды енгізу үшін тартуға мүдделі. Біз еліміздің негізгі экономикалық салаларын дамыту үшін қаржы институттарымыз арқылы барынша қолдау көрсетуге дайынбыз», — деп атап өтті ол.

Кездесу 31 қазанда АҚШ-та Deere & Company, Eurasia Group және «Бәйтерек» холдингі арасында өзара түсіністік туралы Меморандумға қол қою арқылы басталған бастаманың жалғасы болды. Тараптар ынтымақтастықты келесі негізгі бағыттар бойынша дамытуға дайын екендерін растады: заманауи технологияларды енгізу, аграрлық секторды цифрлық трансформациялау және жергілікті өндірістік мүмкіндіктерді кеңейту.

John Deere компаниясы туралы

Deere & Company (www.JohnDeere.com) — ауыл шаруашылығы, құрылыс және орман шаруашылығы техникасын өндіруде әлемдік көшбасшы. Компания клиенттерге өнімділік пен тұрақтылықты қамтамасыз ете отырып, мүмкіндіктер шегін кеңейтуге көмектеседі. John Deere 8R автономды тракторы, See & Spray™ және E-Power экскаваторы сияқты технологиялық өнімдер азық-түлік, тұрғын үй және инфрақұрылымға өсіп келе жатқан әлемдік қажеттіліктерді қанағаттандыруға көмектеседі. Компания сондай-ақ John Deere Financial арқылы қаржылық қызметтерді ұсынады.

Eurasia Group компаниясы туралы

Eurasia Group (https://agromanagement.kz/) — Қазақстанда 20 жылдан астам уақыт бойы John Deere ауыл шаруашылығы техникасының ұлттық дилері. Қазақстандық фермерлерді қолдау мақсатында компания ел бойынша 14 өкілдік ашты, 80 миллион АҚШ долларынан астам инвестиция салды және 600-ден астам жұмыс орнын құрды. Eurasia Group John Deere техникасын пайдалана отырып, 3,5 миллион гектардан астам жерді егіп, 6,5 миллион гектардан астам аумақта егін жинайтын 2500-ден астам отандық ауыл шаруашылығы өндірушілерін қолдайды.