«Бәйтерек» холдингі Kazakhstan Investment Day алаңында Қазақстанның инвестициялық мүмкіндіктерін таныстырды

2026 жылғы 24 ақпанда Майндағы Франкфурт қаласында KfW Bankengruppe штаб-пәтерінде Kazakhstan Investment Day конференциясы өтті. Іс-шара Германия экономикасының Шығыс комитеті мен Қазақстан Республикасының Германия Федеративтік Республикасындағы (ГФР) Елшілігінің қолдауымен ұйымдастырылды. Аталған конференция аясында «Бәйтерек» ұлттық инвестициялық холдингі» АҚ Басқарма Төрағасының орынбасары Тимур Онжанов неміс, еуропалық және қазақстандық инвесторларға арналған қаржылық құралдар тақырыбындағы панельдік сессияда сөз сөйледі.

Іс-шараға 140-тан астам қатысушы, оның ішінде Германияның жетекші қаржы институттарының, өнеркәсіптік компанияларының және мемлекеттік құрылымдарының өкілдері қатысты. Құттықтау сөз сөйлегендер қатарында KfW Басқарма мүшесі ханым мен Қазақстан Республикасының ГФР-дегі Төтенше және Өкілетті Елшісі Нұрлан Онжанов болды. Негізгі баяндамалармен Германия Федералдық экономика және энергетика министрлігінің Мемлекеттік хатшысы доктор Томас Штеффен және Қазақстан Республикасының Өнеркәсіп және құрылыс министрі Ерсайын Нағаспаев сөз сөйледі.

Тимур Онжанов өз баяндамасында «Бәйтерек» холдингін Қазақстанның негізгі даму қаржы институты ретінде таныстырып, инвесторларға ұсынылатын бес негізгі қолдау құралын атап өтті: Қазақстанның Даму Банкі арқылы инвестициялық жобаларды кредиттеу, Өнеркәсіпті дамыту қоры мен ҚазАгроҚаржы арқылы лизингтік қаржыландыру, Қазақстанның Экспорттық-кредиттік агенттігі арқылы экспортты сақтандыру, «Даму» қоры арқылы шағын және орта бизнесті қолдау, сондай-ақ Qazaqstan Investment Corporation арқылы үлестік қаржыландыру.

«Биылғы жылдан бастап «Бәйтерек» инвестициялық холдинг ретінде жұмыс істеуде. Жаңа модель инвестицияларды проактивті тартуға және жобаларды құрылымдаудан бастап қаржыландыруға дейін жүйелі сүйемелдеуге бағытталған. Біз неміс бизнесімен әріптестікке ашықпыз және кешенді қаржылық шешімдер ұсынуға дайынбыз», — деп атап өтті Тимур Онжанов.

Сонымен қатар ол Холдингтің жаңа жұмыс моделін таныстырды. Бұл модель екі қағидатқа негізделген: «Инвестицияларға тапсырыс» — министрліктер мен өңірлер ұсынған жобаларды кешенді пысықтау, және «Инвесторға тапсырыс» — елшіліктер мен қаржылық серіктестердің қатысуымен бірыңғай инвестициялық терезе арқылы капиталды мақсатты түрде тарту.

Баяндамада Қазақстан мен Германия арасындағы стратегиялық маңызды шикізат, жасыл энергетика және өнеркәсіпті декарбонизациялау салаларындағы ынтымақтастық перспективаларына ерекше назар аударылды.

2026 жылғы 23-24 ақпандағы Германияға сапар барысында Тимур Онжанов KfW Research, KfW Development Bank, Deutsche Bank және Euler Hermes басшылығымен жұмыс кездесулерін өткізді. Кездесулер барысында инвестициялық жобаларды бірлесіп қаржыландыру, аналитикалық әдіснамалармен алмасу және экспорттық сақтандыру құралдарын дамыту мәселелері талқыланды. Сондай-ақ Германия экономикасының Шығыс комитетінің атқарушы директоры Михаэль Хармс және Қазақстанның ГФР-дегі Елшілігі өкілдерімен үшжақты кездесу өтті.

Анықтама үшін:

«Бәйтерек» ұлттық инвестициялық холдингі» АҚ — экономиканы мемлекеттік қолдау шараларын 9 еншілес және тәуелді ұйым арқылы жүзеге асыратын интеграцияланған даму институты.

KfW Bankengruppe — әлемдегі ірі даму банктерінің бірі. 2024 жылы 112,8 млрд еуро көлемінде қаржыландыру ұсынды. Топ құрамына KfW IPEX-Bank (экспорттық және жобалық қаржыландыру) және DEG (дамушы елдердегі жеке секторды қаржыландыру) кіреді.

Kazakhstan Investment Day — KfW алаңында Германия экономикасының Шығыс комитеті мен Қазақстан Республикасының ГФР-дегі Елшілігінің қатысуымен ұйымдастырылған, Қазақстанның инвестициялық әлеуетіне арналған конференция.