«Бәйтерек» пен Иордания экономиканың шикізаттық емес секторларындағы ынтымақтастықты нығайтуда

Иордания астанасында Қазақстан Республикасының Иорданиядағы Елшілігі «Kazakh Invest» ҰК» АҚ және Иорданияның сауда палатасымен бірлесіп ұйымдастырған Қазақстан-Иордан дөңгелек үстелі болып өтті. Іс-шараға екі елдің мемлекеттік органдары мен жеке секторының 100-ге жуық өкілі қатысты.

Негізгі пікірталастар экономиканың шикізаттық емес секторларындағы ынтымақтастықты кеңейтуге бағытталды. Қатысушылар ауыл шаруашылығы, тамақ өнеркәсібі, көлік, логистика, тұрақты энергетика, IT және жеңіл өнеркәсіп салаларындағы бірлескен жобаларды іске қосу перспективаларын талқылады.

Өз сөзінде «Бәйтерек» ҰБХ» АҚ Басқарушы директоры Нияз Көшкімбаев холдингтің Қазақстан экономикасын дамытудағы басты рөлі туралы егжей-тегжейлі айтып берді. Оның айтуынша, холдинг өнеркәсіптік және инновациялық даму, агроөнеркәсіптік кешен, тұрғын үй құрылысы және экспортты қолдау сияқты стратегиялық секторлардағы инвестициялық жобаларды белсенді қолдайды. 2023 жылы холдинг құрылымына кіретін Қазақстанның Даму Банкі шамамен 2,3 миллиард АҚШ доллары сомасындағы жобаларды қаржыландырды, ал Аграрлық несие корпорациясы 768 миллион АҚШ доллары сомасына кредит бөлді, осылайша елдің азық-түлік қауіпсіздігін нығайтуға белсенді ықпал етті.

«Бәйтерек» жобалармен жұмыс істеудің барлық кезеңдерінде кешенді қызметтер мен қолдау көрсете отырып, шетелдік инвесторлар үшін қолайлы жағдайлар жасайды. Холдингтің еншілес компанияларымен өзара іс-қимыл жасау арқылы инвесторлар экспорттық операцияларды қаржыландыруға, кепілдіктерге және қолдауға қол жеткізе алады. Тұрақты энергетика, IT және логистика саласындағы жобаларға ерекше назар аударылады, бұл Қазақстанды ұзақ мерзімді жобаларды іске асыру үшін тартымды орынға айналдырады», - деді Көшкімбаев.

Дөңгелек үстел шеңберінде қазақстандық және иорданиялық компаниялар арасында B2B кездесулер өтті. Иорданиялық мүшелер арасында «Hijazi & Gousheh», «Manaseer Group», «Modern company for Fertilizer Production» және басқа да көптеген компаниялардың өкілдері болды.

Іс-шара қорытындысы бойынша сауда, білім беру, жасыл технологиялар, логистика және басқа да секторлар саласындағы келісімдерді қоса алғанда, қазақстандық және иорданиялық ұйымдар арасында өзара түсіністік пен ынтымақтастық туралы тоғыз меморандумға қол қойылды.