«Бәйтерек» холдингі Seoyon E-HWA компаниясымен Қазақстанда автокомпоненттерді жергіліктендіру мәселелерін талқылады

2025 жылғы 9 қыркүйекте «Бәйтерек» ұлттық басқарушы холдингінде Басқарма төрағасының орынбасарлары Жандос Шайхы мен Тимур Онжанов Оңтүстік Кореяның Seoyon E-HWA компаниясының өкілдерімен кездесті. Компания автомобиль компоненттерін өндіруге маманданған.

Қазақстан тарапынан кездесуге Холдингтің салалық департамент басшылары, сондай-ақ «Қазақстанның Даму Банкі» АҚ, «Өнеркәсіпті дамыту қоры» АҚ және «Kazakh Invest» ұлттық компаниясы» АҚ өкілдері қатысты. Seoyon E-HWA тарапынан Қазақстандағы бизнес дамуы жөніндегі бас директор Чо Ин Чже, қаржы директоры Ким Чжун Хён, сондай-ақ серіктес ұйым – «ARCUS Инвест» ЖШС өкілдері қатысты.

Кездесу барысында тараптар Қазақстанда автокомпоненттер өндірісін жергіліктендіру жоспарын KIA Qazaqstan жобасы және басқа да жаңа автомобиль зауыттары аясында талқылады. Атап айтқанда, Қостанай облысында жылына 50 000 жиынтыққа дейін автокомпоненттер (автокресло, бампер және басқа бөлшектер) шығаратын зауыт салу жоспарланып отыр.

«Seoyon E-HWA компаниясымен бірлескен жобаны Қостанай кластері аясында іске асыру Қазақстанның автомобиль өнеркәсібіндегі жергіліктендіру деңгейін едәуір арттырады. «Бәйтерек» холдингі өндірісті сәтті іске қосу мен экспорттық әлеуетті дамыту үшін инвесторларға жан-жақты қолдау көрсетуге дайын», – деп атап өтті Жандос Шайхы.

Кәсіпорынның іске қосылуы Қазақстанның машина жасау саласының дамуына қосымша серпін беріп, жаңа жұмыс орындарын ашуға және елдің өңірлік автопром жеткізу тізбегіндегі орнын нығайтуға ықпал етеді деп күтілуде.

Seoyon E-HWA – Hyundai және Kia үшін автокомпоненттер шығаратын әлемдегі жетекші өндірушілердің бірі. Компания ішкі (есік панельдері, консольдер, орындықтар) және сыртқы (бамперлер, қаптамалар) бөлшектерді шығарады. Сондай-ақ «ақылды өндіріс» технологияларын және экологиялық таза материалдарды белсенді енгізіп, зауыттардың жаһандық желісін дамытып, халықаралық жеткізу тізбегінде берік орнын сақтап келеді.