«Бәйтерек» холдингі кореялық инвесторлармен және өнеркәсіптік компаниялармен ынтымақтастықты кеңейтуде

2026 жылғы 4–7 мамыр аралығында «Бәйтерек» ұлттық инвестициялық холдингі» АҚ басқарушы директоры Сәкен Олжабаев Қазақстан делегациясының Корея Республикасына жұмыс сапары аясында бірқатар кездесулерге қатысты. Сапар Қазақстан Республикасы Сыртқы істер министрлігінің Инвестициялар комитетінің ұйымдастыруымен өтіп, Қазақстан мен Оңтүстік Корея арасындағы инвестициялық және сауда-экономикалық ынтымақтастықты дамытуға бағытталды.

Қазақстан делегациясының құрамына ҚР СІМ Инвестициялар комитетінің, «Самұрық-Қазына» АҚ, QazaqGaz, KEGOC, Kazakh Invest, QazTrade өкілдері, сондай-ақ Қазақстан өңірлерінің әкімдіктері мен арнайы экономикалық аймақтарының өкілдері кірді.

Іскерлік бағдарлама аясында қазақстандық делегация Оңтүстік Кореяның ірі өнеркәсіптік, инфрақұрылымдық және сауда компанияларының басшыларымен кездесті. Атап айтқанда, энергетика және ауыр машина жасау саласындағы жетекші компаниялардың бірі Doosan Enerbility, сауда, логистика және инфрақұрылымдық жобалар бағытында жұмыс істейтін халықаралық LX International корпорациясы, автокөлік компоненттерін өндіруші THN Corporation және Seyon E-Hwa компаниялары, сондай-ақ инвестициялық және технологиялық шешімдерге маманданған YPP Corp. пен BORNECO Systems өкілдерімен келіссөздер өтті. Сонымен қатар Кореяның халықаралық сауда қауымдастығы (KITA) мен Корея импорттаушылар қауымдастығының (KOIMA) өкілдерімен кездесулер ұйымдастырылды. Аталған ұйымдар Корея Республикасының ірі экспорттық-импорттық компанияларын біріктіреді.

Кездесулер барысында тараптар бірлескен инвестициялық жобаларды іске асыру, өндірістерді жергіліктендіру, өнеркәсіптік кооперацияны, көлік-логистикалық инфрақұрылымды, энергетиканы және Қазақстандағы жоғары технологиялық өндірістерді дамыту перспективаларын талқылады.

«Бәйтерек» холдингінің өкілдері кореялық серіктестерге инвестициялық жобаларды қаржылай қолдау тетіктері мен Холдинг қызметінің негізгі бағыттарын таныстырды.

Корея тарапы өңдеу өнеркәсібі, инфрақұрылым, агроөнеркәсіптік кешен және экспортқа бағдарланған өндірістер бағытындағы жобаларды қолдау құралдарына ерекше қызығушылық танытты. Сондай-ақ индустриялық жобаларды қаржыландыру және өндірістерді Қазақстан аумағында жергіліктендіру мәселелері қарастырылды.

Автомобиль өнеркәсібіндегі ынтымақтастықты дамытуға да ерекше назар аударылды. Қазақстан делегациясы Seyon E-Hwa компаниясына барып, Қостанай облысында автокомпоненттер өндірісін жергіліктендіру жобасының жоспарымен танысты және алдағы ынтымақтастық перспективаларын талқылады.

Сапар барысында «Бәйтерек» холдингінің өкілдері Корея Республикасының жетекші қаржы институттарымен, соның ішінде KIND, Korea Eximbank, BNK Financial Group және елдің басқа да ірі қаржы және инвестициялық ұйымдарымен кездесулер өткізді. Келіссөздер аясында Қазақстандағы инфрақұрылымдық, индустриялық және экспортқа бағдарланған жобаларға кореялық инвестициялар мен қаржыландыру тарту мүмкіндіктері қарастырылды.

Сапар аясында Алматы агломерациясында жаңа экономикалық өсім, инновациялар және заманауи қалалық орта орталығын қалыптастыруға бағытталған «Alatau City» жобасына да ерекше көңіл бөлінді. Қазақстан тарапы жобаның инвестициялық және инфрақұрылымдық әлеуетін, сондай-ақ өнеркәсіпті, жоғары технологиялық өндірістерді және заманауи қалалық инфрақұрылымды дамыту үшін озық кореялық технологиялар мен серіктестерді тарту мүмкіндіктерін таныстырды.

7 мамыр күні Сеул қаласында мемлекеттік органдар, қаржы институттары және екі елдің бизнес қауымдастығы өкілдерінің қатысуымен «Қазақстанның кореялық бизнеске арналған инвестициялық мүмкіндіктері» тақырыбында дөңгелек үстел өтті. Іс-шара барысында Сәкен Олжабаев «Бәйтерек» холдингінің экономиканы әртараптандырудағы және Қазақстанға инвестициялық капитал тартудағы рөлі туралы баяндады. Пікірталас барысында қатысушылар өнеркәсіп, энергетика, инфрақұрылым, газ саласы және құрылымдық қаржыландыру бағыттарындағы ынтымақтастық перспективаларын талқылады.

«Корея Республикасы — Қазақстанның Азиядағы стратегиялық маңызды серіктестерінің бірі. «Бәйтерек» холдингі үшін өнеркәсіп, инфрақұрылым және технологиялар салаларында кореялық компаниялармен ынтымақтастықты дамыту ерекше маңызға ие. Біз Холдингтің қолдау құралдарын пайдалана отырып, бірлескен өндірістер құру мен инвестициялық жобаларды іске асырудың жоғары әлеуетін көріп отырмыз», — деді Сәкен Олжабаев.

«Бәйтерек» холдингі Қазақстан экономикасын әртараптандыруға және жаңа өсу нүктелерін қалыптастыруға бағытталған стратегиялық жобаларды іске асыру үшін халықаралық ынтымақтастықты дамыту және шетелдік инвестициялар тарту жұмыстарын жалғастырады.