«Бәйтерек» холдингі өңірлерде ЭКСЖ ұлттық жобасын қаржыландыру тетіктерін түсіндіруде

«Бәйтерек» ұлттық басқарушы холдингі» АҚ басқарушы директоры Алия Мырзағалиева Қазақстан Республикасы Ұлттық экономика министрлігінің Табиғи монополияларды реттеу комитеті, Қазақстан Республикасы Өнеркәсіп және құрылыс министрлігі мен жергілікті атқарушы органдардың өкілдерімен бірлесіп, «Энергетика және коммуналдық секторларды жаңғырту» (ЭКСЖ) ұлттық жобасын қаржыландыру тетіктерін түсіндіру бойынша өңірлік семинар-кеңестер өткізуде.

Іс-шаралар барысында «Бәйтерек» холдингінің Ұлттық жобаның қаржылық операторы ретіндегі рөліне ерекше назар аударылды. Қатысушыларға қолдау құралдары таныстырылды, оның ішінде:

• Қазақстанның Даму Банкі арқылы тікелей кредит беру;
• Қазақстан тұрғын үй компаниясы желісі бойынша жергілікті атқарушы органдардың мемлекеттік бағалы қағаздарын шығару есебінен қаржыландыру;
• кепілдік жеткіліксіз болған жағдайда «Даму» қорының кепілдік тетіктері.

Сонымен қатар, табиғи монополия субъектілерінің қаржылық операторымен өзара іс-қимыл жасау рәсімдері өтінім беруден бастап жобаларды қарау, қаржыландыру және әрі қарай сүйемелдеу кезеңдеріне дейін кеңінен түсіндірілді.

«Табиғи монополия субъектілерінің қолжетімді қаржылық құралдар жөнінде толық әрі нақты түсінік алуы және қолдау шараларын тиімді пайдалана білуі біз үшін маңызды. Ұлттық жобаны іске асыру мемлекет, бизнес және қаржы институттарының тығыз байланысын талап етеді», – деді «Бәйтерек» ҰБХ» АҚ басқарушы директоры Алия Мырзағалиева.

Өңірлік семинарлар Қарағанды және Ұлытау облыстарында (Қарағанды қ.), Ақмола және Солтүстік Қазақстан облыстарында (Көкшетау қ.), Шығыс Қазақстан және Абай облыстарында (Семей қ.), сондай-ақ Түркістан және Жамбыл облыстарында және Шымкент қаласында өтті. 29 тамызда жиындар Павлодар және Қызылорда облыстарында ұйымдастырылды. Алдағы уақытта Жетісу, Маңғыстау, Алматы және Атырау облыстарында, сондай-ақ Алматы және Астана қалаларында өткізу жоспарланған. Соңғы кезеңде Батыс Қазақстан, Ақтөбе және Қостанай облыстары қамтылады.

Жобаға қатысудың практикалық қырларына және кепілдік құралдарын пайдалану мәселелеріне ерекше назар аударылды.

«Мұндай түсіндіру жұмысы компаниялардың Ұлттық жобаға қатысуға дайындалуына, қаржылық операторымен өзара іс-қимылды дұрыс жолға қоюына және инфрақұрылымдық жобаларды іске асыру тиімділігін арттыруына мүмкіндік береді», – деп атап өтті «Бәйтерек» ҰБХ» АҚ Қолдау құралдарын талдау және өнімдерді дамыту департаментінің директоры Ляззат Бишенова.

«Бәйтерек» холдингі мемлекеттік органдар және реттеушімен бірлескен жұмысын өңірлерде одан әрі жалғастырады. Бұл инфрақұрылымды жаңғырту үдерісін жеделдетуге, коммуналдық қызметтердің сапасын арттыруға және Қазақстан экономикасының тұрақты дамуына жағдай жасауға ықпал етеді.