«Бәйтерек» холдингі I тоқсанның қорытындыларын қарап, Инвестициялық саясатқа енгізілетін өзгерістерді мақұлдады

21 мамырда «Бәйтерек» ұлттық басқарушы холдингі» АҚ Директорлар кеңесінің Стратегиялық жоспарлау комитетінің отырысы өтті. Күн тәртібінде Холдингтің 2025 жылғы бірінші тоқсандағы қызметінің негізгі нәтижелері қаралып, сондай-ақ Инвестициялық саясатқа өзгерістер мақұлданды.

Есептік кезеңде Холдингтің еншілес ұйымдары тарапынан шағын және орта бизнес субъектілеріне 439 млрд теңге көлемінде қаржылық қолдау көрсетілді. Бұл өткен жылдың сәйкес кезеңімен салыстырғанда 28%-ға артық. Қаржыландырудың елеулі бөлігі экспортқа бағдарланған өндірістерді дамытуға (255,5 млрд теңге), агроөнеркәсіптік кешенді қолдауға (233,4 млрд теңге), сондай-ақ тұрғын үймен қамтамасыз етуге бағытталды – 11,8 мыңнан астам отбасы тұрғын үй несиелері мен кепілдіктер алды.

Сондай-ақ, Комитет Инвестициялық саясатқа енгізілетін өзгерістерді мақұлдады. Өзгерістер жобаларды іріктеу рәсімдерінің ашықтығын арттыруға, экологиялық және әлеуметтік критерийлерді интеграциялауға, сондай-ақ жобаны дамыту индексін есептеу әдістемесін жетілдіруге бағытталған.

Құжат сондай-ақ Қазақстан Республикасының 2029 жылға дейінгі Инвестициялық саясатының тұжырымдамасына сәйкестендірілді. Онда «жасыл» жобаларды жіктеу қағидалары мен мемлекеттік және шетелдік серіктестермен өзара іс-қимыл ережелері қамтылған.

Қабылданған шешімдер Холдингтің басым салаларды қолдауға және ел экономикасының тұрақты өсуіне жәрдемдесуге арналған негізгі даму институты ретіндегі рөлін күшейтуге бағытталған.