«Бәйтерек» холдингі Германияның агробизнес өкілдеріне ынтымақтастық мүмкіндіктерін таныстырды

Астанада Германияның агробизнес делегациясымен іскерлік дөңгелек үстел өтті. «Бәйтерек» холдингінің басқарушы директоры Нияз Көшкімбаев агроөнеркәсіптік кешенді қолдау құралдары мен неміс компанияларымен бірлескен жобаларды іске асыру мүмкіндіктерін таныстырды.

Германия делегациясын Бундестаг депутаты, Германияның Ауыл шаруашылығы, азық-түлік және өңірлік бірегейлік федералдық министрінің жанындағы парламенттік статс-хатшы Мартина Энгельхардт-Копф бастап келді. Кездесу Германия агробизнес альянсы, Герман-Қазақстан аграрлық-саяси диалогы және Германия машина жасаушылар одағының ұйымдастыруымен CT Agro компаниясының алаңында өтті.

Қатысушылар қазақстандық ауыл шаруашылығы тауарын өндірушілердің қажеттіліктерін, аграрлық өндірістің тиімділігін арттыруға арналған технологиялық шешімдерді және екіжақты әріптестіктің перспективаларын қарастырды. Ауыл шаруашылығы техникасын жаңартуға, жабдық өндірісін жергіліктендіруге, ауыл шаруашылығы өнімдерін өңдеуге және заманауи агротехнологияларды енгізуге ерекше назар аударылды.

Нияз Көшкімбаев «Бәйтерек» холдингі компаниялар тобының аграрлық жобаларды түрлі кезеңдерде қолдауға мүмкіндік беретін қаржы құралдары туралы айтты. Олардың қатарында кредит беру, техника лизингі, кепілдік беру және капиталға қатысу бар. Ол неміс өндірушілерімен ынтымақтастықты жабдық жеткізу арқылы да, Қазақстанда өндірістік және сервистік қуаттарды құру арқылы да дамытуға болатынын атап өтті.

«Біз шетелдік инвесторға бәсекелес емеспіз, Қазақстан тарапынан бірлескен инвестор әрі тәуекелдерді бөлісетін әріптеспіз. Дөңгелек үстелдің нәтижесін хаттамамен емес, Холдинг пен неміс әріптестері тарапынан жауапты тұлғалар белгіленген нақты жобалық бастамалар тізбесімен бекітуді ұсынамын», - деп атап өтті ол.

Ұсынылған деректерге сәйкес, 2025 жылы Аграрлық несие корпорациясы мен «ҚазАгроҚаржы» агроөнеркәсіптік кешенді қолдауға 1,1 трлн теңгеден астам қаражат бағыттаған. Бұл алдыңғы жылғы көрсеткіштен 36%-ға жоғары. Қаржыландыру маусымдық дала жұмыстарын, техника сатып алуды, өнім өңдеуді, мал шаруашылығын және инвестициялық жобаларды қамтыды. Соңғы бес жылда Германияда шығарылған 948 бірлік ауыл шаруашылығы техникасы лизингке берілді.

Әріптестіктің перспективалы бағыттары ретінде суармалы егіншілік, өнімді сақтау және өңдеу, сүт-тауар фермаларын дамыту, мал азығын өндіру және мал шаруашылығына арналған цифрлық шешімдер белгіленді. Неміс технологиялық компанияларының осындай жобаларға қатысуы қазақстандық аграршылардың заманауи жабдыққа қолжетімділігін кеңейтіп, ауыл шаруашылығының өнімділігін арттыруға мүмкіндік береді.