«Бәйтерек» холдингі қазақ-түрік бизнес-форумы аясында серіктестік байланыстарды нығайтуда

2026 жылғы 14 мамыр, Астана – Қазақстан Республикасының Президенті Қасым-Жомарт Тоқаев пен Түркия Республикасының Президенті Режеп Тайип Ердоғанның қатысуымен өткен қазақ-түрік бизнес-форумы аясында «Бәйтерек» ұлттық инвестициялы холдингі» АҚ экономиканың негізгі салаларындағы серіктестермен өзара түсіністік туралы екі меморандумға қол қойды.

Контекст

Қазақстан мен Түркия арасындағы экономикалық қатынастар тұрақты өсім траекториясы бойынша дамып келеді. 2025 жылдың қорытындысы бойынша екі ел арасындағы тауар айналымы 5,4 млрд АҚШ долларынан асып, алдыңғы жылмен салыстырғанда 8,8%-ға өсті. Бұл ретте Қазақстан экспорты 17,7%-ға артып, шамамен 4 млрд АҚШ долларына жетті. Түркия Қазақстанның негізгі сауда серіктестерінің бестігіне тұрақты түрде кіреді, ал 2005 жылдан бері Түркияның Қазақстан экономикасына салған инвестицияларының жиынтық көлемі 6 млрд АҚШ долларына жетті. Бүгінде Қазақстанда жалпы құны 3 млрд АҚШ долларынан асатын 78 бірлескен жоба іске асырылды, тағы 39-ға жуық жоба жүзеге асыру кезеңінде тұр.

«Бәйтерек» холдингі бұл күн тәртібін жүйелі түрде кеңейтуге қатысып, Қазақстан экономикасының негізгі секторларында жетекші түрік компанияларымен серіктестікті дамытып келеді. Бірлескен жұмыстың бағыттарына денсаулық сақтау, химия және мұнай өңдеу өнеркәсібі, агроөнеркәсіптік кешен, сондай-ақ туристік инфрақұрылым кіреді. Холдинг серіктестерінің қатарында Қазақстанда жоғары қосылған құны бар жобаларды жүзеге асырып жатқан Ronesans, Yildirim Group және Tiryaki Agro секілді компаниялар бар.

Қол қойылған меморандумдар

Бірінші меморандум Қазақстан Республикасының мұнай өңдеу секторын дамыту мақсатында «Бәйтерек» холдингі, «Kyzylorda Refinery» ЖШС, SWISSFE CENTRAL ASIA LTD жеке компаниясы және «Ronesans Infra Construction» ЖШС арасында жасалды. Екінші меморандум «Fabe-Agro» ЖШС-мен жасалып, елдің агроөнеркәсіптік секторындағы инвестициялық жобаны қолдауға бағытталды.

«Бәйтерек» холдингі тарапынан құжаттарға Басқарма Төрағасы Рустам Қарагойшин қол қойды.

«Қол қойылған келісімдер біздің серіктестермен бірлесіп Қазақстандағы басым инвестициялық жобаларды іске асыруға дайын екенімізді көрсетеді. Форум ұзақ мерзімді ынтымақтастықты дамытуға қуатты серпін берді және «Бәйтерек» холдингі ел экономикасы үшін стратегиялық маңызы бар жобаларды қолдау мақсатында топ құралдарын белсенді пайдалануға ниетті», – деді Холдинг басшысы.

Форум Түркия Республикасы Президентінің Қазақстанға мемлекеттік сапары аясында өтті. Жоғары деңгейдегі келіссөздердің қорытындысы бойынша екі елдің мемлекет басшылары Мәңгілік достық және кеңейтілген стратегиялық әріптестік туралы декларацияға қол қойды.