Қазақстан-Словения бизнес-форумында «Бәйтерек» жаңа бастамаларын ұсынды

Астанада Қазақстан-Словения бизнес-форумы өтті, онда «Бәйтерек» ҰБХ» АҚ Басқарма төрағасы Рустам Қарағойшин словениялық бизнес өкілдеріне Қазақстанның инвестициялық тартымдылығын күшейтуге бағытталған Холдингтің жаңа бастамаларын ұсынды.

Спикердің айтуынша, «Бәйтерек» барлық деңгейдегі кәсіпкерлікті қолдай отырып және басым салаларға инвестицияларды ұлғайта отырып, Үкіметтің бас қаржы агенті ретінде өз рөлін дамытуды жалғастырады. 2027 жылға дейін Холдинг бизнесті қолдауға, тұрғын үй салуға және ұлттық инвестициялық жобаларды іске асыруға 10 трлн теңгеден астам қаржы бөлуді жоспарлап отыр.

Бастамалардың бірі – инвестициялық портфельді кеңейту, кепілдік құралдарын жетілдіру, қаржыландыруға қол жеткізуді жеңілдету, бизнесті қолдаудың ашықтығы мен тиімділігін арттыру.

Шетелдік серіктестер логистика, металлургия, химия, энергетика мен АӨК секторларына ерекше қызығушылық танытып отыр. Р. Қарағойшин енгізіліп жатқан кепілдік механизмдері инвесторлар үшін тәуекелдерді азайтып, бірлескен жобаларды тартымды ететінін атап өтті.

«Бүгінде «Бәйтерекпен» ынтымақтастық бұрынғыдан да тиімдірек болмақ. Біз инвесторларға нақты табыс әкелетін практикалық шешімдерге баса назар аударамыз», - деді Холдинг басшысы.

Сөз соңында ол словениялық серіктестерді инвестициялық мүмкіндіктерді егжей-тегжейлі талқылауға шақырды және «Бәйтерек» командасының жан-жақты қолдау көрсетуге дайын екендігін білдірді.

Форум Қазақстан-Словения экономикалық байланыстарын нығайту және инвестициялық әрі инновациялық қарым-қатынастағы жаңа өсу нүктелерін талқылау үшін маңызды алаңға айналды.