Инвестициялардан өндіріске дейін: Холдинг «Бәйтеректің» қызметімен байланысты Жолдаудың алты басымдығы

 Қазақстан халқына арналған «Жаңа тарихи кезеңдегі Қазақстанның өзекті міндеттері» атты Жолдауында Президент Қасым-Жомарт Тоқаев инвестициялар тарту, агроөнеркәсіптік кешенді дамыту, кәсіпкерлікті қолдау және инфрақұрылымды жаңарту міндеттерін белгіледі. Бірқатар бағыт бойынша Мемлекет басшысы «Бәйтерек» холдингінің рөлін жеке атап өтті.

Бұл міндеттерді ортақ тәсіл біріктіреді: инвестициялардың нәтижесі өндірістерді құру мен дамытуда, олардың тиімділігін арттыруда және экономикаға нақты үлес қосуда көрініс табуға тиіс. Холдингтің қызметімен байланысты Жолдаудың алты бағытын қарастырайық.

1. Инвестициялар тартудағы белсенді рөлді арттыру

Президент инвестициялар тартудың бірыңғай жүйесін жетілдіру және инвесторлармен жұмысты үйлестіру қажеттігін атап өтті. Өкілеттіктердің қайталануы және мемлекеттік құрылымдардың үйлесімсіз әрекеттері бұл жұмысты қиындатып отыр, сондықтан жүйелі шешімдер қабылдау қажет.

Осы тұрғыда Мемлекет басшысы инвестициялық мәселелерді шешуге «Бәйтерек» холдингінің белсендірек қатысуын қолдады. Бұл ретте Экономика министрлігі мен Сыртқы істер министрлігі осы саладағы жекелеген функцияларын орындауды жалғастырады.

Тартылатын инвестициялардың сапасы ерекше маңызға ие. Президент озық технологиялары, сараптамалық тәжірибесі және әлемдік нарықтарға шығу мүмкіндіктері бар компанияларды тарту қажеттігін атап өтті. Нәтиже іске қосылған өндірістердің саны мен сапасына, сондай-ақ олардың экономикаға қосқан нақты үлесіне қарай бағалануға тиіс.

2. Құны 500 млрд теңгеден асатын тамақ өнеркәсібі жобалары

Жолдауда «Бәйтерек» холдингі дайындаған жалпы құны 500 млрд теңгеден асатын тамақ өнеркәсібіндегі перспективалы жобалар тізбесі атап өтілді. Президент жеңілдетілген шарттармен қолжетімді қаржыландыру мәселелерін жедел шешу және сапалы жобаларды іске асыру қажеттігін көрсетті.

Бұл бағыт ауыл шаруашылығы өнімдерін терең өңдеуді дамытуға байланысты. Өз елімізде өңдеу көлемін ұлғайту дайын өнім шығаруды кеңейтуге және ел ішінде қосылған құнды арттыруға мүмкіндік береді.

Мемлекет басшысы жүгері мен сояны өңдеу, заманауи мақта-тоқыма кластерін құру және мал шаруашылығы жобаларын дамыту бойынша табысты тәжірибеге де назар аударды. Үкіметке озық тәжірибелерді кеңінен енгізу және инвесторларды уақтылы қолдау үшін жағдай жасау міндеті қойылды.

3. Ауыл шаруашылығына ұзақ мерзімді инвестициялар тарту

Президент ауыл шаруашылығын жеңілдетілген қаржыландыру көлемі 1 трлн теңгеден 1,5 трлн теңгеге дейін ұлғайғанын атап өтті. Сонымен қатар қаражаттың бір бөлігі ағымдағы қажеттіліктер мен айналым капиталын толықтыруға бағытталады.

Келесі міндет – аграршыларды ұзақ мерзімді даму жоспарларын жүзеге асыруға мүмкіндік беретін инвестициялық ресурстармен қамтамасыз ету. Бұл шаруашылықтарға өндірісті жаңғыртуға және оның тиімділігін арттыруға инвестиция салуға жол ашады.

Сондай-ақ саланы технологиялық жаңарту және Қазақстанда заманауи тракторлар мен комбайндар өндірісін ұлғайту мәселелеріне ерекше назар аударылды. Қаржыландырудың қолжетімділігі мен техниканы жаңарту ауыл шаруашылығының өнімділігін арттыруға ықпал етуге тиіс.

4. Өндірістен өткізуге дейінгі инфрақұрылым

Агроөнеркәсіптік кешенді дамыту өндіріс, өңдеу, сақтау және өнімді өткізу кезеңдерін қамтитын бүкіл тізбек бойынша жүйелі жұмысты талап етеді.

Президент агрологиялық орталықтардың қызметтерін ірі кәсіпорындар да, шағын фермерлік шаруашылықтар да кедергісіз пайдалана алуы керектігін атап өтті. Үкімет «Бәйтерек» холдингімен бірлесіп, ауыл шаруашылығы инфрақұрылымын дамыту бойынша нақты шешімдер қабылдауға тиіс.

Бұл міндеттің практикалық мәні – сақтау және өткізу мүмкіндіктері өндіріс көлемінің өсуіне сәйкес болуы керек. Қолжетімді инфрақұрылым аграршыларға тұрақты жұмыс істеуге және өнімдерін нарыққа шығаруға жағдай жасайды.

5. Инфрақұрылымдық жобаларға арналған отандық өндіріс

Жолдауда экономиканың негізгі салаларында өнімділігі жоғары терең өңдеу жобаларын іске асыру басымдық ретінде белгіленді.

Ірі инфрақұрылымдық бастамаларға қажетті құрылыс материалдарын, металл конструкцияларын және инженерлік жабдықтарды Қазақстанда өндіруге ерекше көңіл бөлінді. Мұндай өндірістер ауқымды құрылыстың өнеркәсіптік негізіне айналуға тиіс.

Бұл тәсіл инфрақұрылымды жаңартуды отандық кәсіпорындарды дамытумен байланыстырады: құрылыс сұраныс қалыптастырады, ал қазақстандық өндірушілер өнім көлемін ұлғайтуға мүмкіндік алады.

6. Шағын және орта бизнестің өсуіне жағдай жасау

Президент орта бизнесті дамыту жөніндегі арнайы жоспар әзірлеу міндетін қойды. Онда кәсіпорындарды ұзақ мерзімді қаржыландыру және технологиялық жаңғырту тетіктері қарастырылуға тиіс.

Тағы бір бағыт орта бизнестің ірі компаниялармен кооперациясын нығайтуға және оның өнімдерін өткізуге жағдай жасауға байланысты. Сонымен қатар бүгінгі таңда едәуір бөлігі сауда саласында шоғырланған шағын бизнесті әртараптандыру қажеттігі атап өтілді.

Мемлекет басшысы шағын және орта кәсіпорындардың мемлекеттік органдар мен квазимемлекеттік компаниялардың сатып алуларына қол жеткізу тетіктерін жетілдіруді де ұсынды. Осылайша, кәсіпкерлікті қолдау өзара байланысты бірнеше міндетті қамтиды: қаржы ресурстарына қол жеткізу, өндірісті жаңарту және өткізу нарықтарын кеңейту.

Жолдауда белгіленген басымдықтар инвестициялық саясатты экономиканың нақты қажеттіліктерімен байланыстырады. «Бәйтерек» холдингі үшін инвестициялық жұмысқа белсендірек қатысу, тамақ өнеркәсібіндегі перспективалы жобаларды іске асыру және Үкіметпен бірлесіп аграрлық инфрақұрылымды дамыту жөніндегі шешімдерді пысықтау ерекше маңызға ие. Олардың практикалық нәтижесі өндірістерді дамыту және қазақстандық бизнестің мүмкіндіктерін кеңейту арқылы көрініс табуға тиіс.