«Бәйтерек» холдингі Минскіде инвестиция тарту және технологиялық ынтымақтастық мәселелерін талқылады

Беларусьте «Бәйтерек» ұлттық инвестициялық холдингінің басқарушы директоры Анна Лукинаның іскерлік бағдарламасы жалғасты. Минскіде ол Беларусь-Қазақстан Іскерлік кеңесінің отырысына қатысып, инвестициялық және технологиялық серіктестермен кездесулер өткізді. Талқылаулардың негізгі тақырыптары инвестиция тарту, беларусьтік IT-компаниялардың Қазақстан нарығына шығуы және бірлескен өндірістік жобаларды дамыту болды.

Іскерлік кеңестің отырысы «ИННОПРОМ» өнеркәсіп көрмесі аясында өтті. Алаң өнеркәсіптік кооперация, аграрлық серіктестік және технология алмасу мәселелерін талқылау үшін екі ел кәсіпорындарының өкілдерін біріктірді. Қатысушылар ынтымақтастықтың өзекті мәселелері мен бірлескен жұмыстың перспективалық бағыттарын қарастырды. Бағдарлама аясында кәсіпорындардың стендтерінде де келіссөздер өтіп, компаниялар өздерінің өндірістік мүмкіндіктерін таныстырды және ықтимал жобаларды талқылады.

Беларусь Республикасының Ұлттық инвестициялар және жекешелендіру агенттігімен кездесуде Анна Лукина инвестициялық жобаларды мемлекеттік қолдау тәжірибесі мен инвесторларды сүйемелдеу тетіктерін талқылады. Қаржыландыру, сақтандыру, кепілдік беру және экспортты қолдау құралдарына ерекше назар аударылды. Осындай тәсілдер бойынша тәжірибе алмасу жеке капиталды тарту және бірлескен бастамаларды сүйемелдеу тұрғысынан практикалық маңызға ие.

Беларусь Республикасының Жоғары технологиялар паркімен жеке кездесу өтті. Тараптар беларусьтік IT-компанияларды Қазақстанға тарту және қаржы технологиялары, жасанды интеллект, өнеркәсіпті автоматтандыру мен цифрлық инфрақұрылым салаларындағы ынтымақтастық мүмкіндіктерін қарастырды. Сондай-ақ зерттеу орталықтарын құру перспективалары талқыланды. Бұл бағыттар қазақстандық кәсіпорындарға технологиялық шешімдерді енгізуге және жергілікті құзыреттерді дамытуға мүмкіндік береді.

Татарстан Республикасының Өнеркәсіптік кластері өкілдерімен кездесуде өнеркәсіптік серіктестік мәселелері талқыланды. Өзара инвестиция тарту, технологиялар трансфері және бірлескен әзірлемелер, сондай-ақ алдағы бірлескен жобалар үшін жабдықтар мен жинақтауыштарды жеткізу мүмкіндіктері қарастырылды.

Өткізілген кездесулер «Бәйтерек» холдингінің инвестициялық және технологиялық серіктестер аясын кеңейтуге бағытталды. Қазақстан үшін бұл жұмыс кәсіпорындарды жаңғыртуға, жаңа технологияларды игеруге және бәсекеге қабілетті өндірістерді дамытуға мүмкіндік береді.